Reviews for தேசாந்திரி

பயணத்தின் மகிழ்ச்சி சென்றடையும் இடத்தில் மட்டுமல்ல; அதற்கான தயாரிப்பிலும் வழியில் சந்திக்கும் மனிதர்களிலும் இருக்கிறது. தான் சென்ற ஊர்கள், அவற்றின் வரலாறு, மனிதர்களின் நம்பிக்கைகள், தக்க நேரத்தில் கிடைத்த உதவிகள் ஆகியவற்றைப் பயண அனுபவங்களாகப் பகிர்கிறார் எஸ். ராமகிருஷ்ணன். புத்தகங்களைப் போலவே பயணங்களும் மனிதனைப் பக்குவப்படுத்துகின்றன என்ற எண்ணம் வாசிப்பின் முடிவில் தோன்றுகிறது.

இந்தியாவின் பல இடங்களில் மேற்கொண்ட பயணங்களைச் சுவாரசியமாகப் பகிர்கிறார் எஸ். ராமகிருஷ்ணன். நிலத்தின் பண்பாட்டுச் சிறப்புகளையும் மனிதர்களின் நம்பிக்கைகளையும் அறிமுகப்படுத்துவதோடு, இயற்கையை அவர் விவரிக்கும் விதம் அந்த இடங்களுக்குச் செல்லும் ஆவலைத் தூண்டுகிறது. பயணத்தில் சந்திக்கும் மனிதர்களின் அன்புக்கும் முக்கியத்துவம் தரும் இந்தக் கட்டுரைகள், வாசித்துப் பார்க்க வேண்டியவை.

கடல், மலை, நகரம், கலை, வரலாறு எனச் சுற்றியுள்ளவற்றை ரசித்து வாழ நினைவூட்டும் நூல். பழைய நினைவுகளில் திளைக்க விரும்புவோருக்கு ஏற்ற வாசிப்பு.

சத்னாவில் ஒரு இரவு, நினைவில் எறிந்த கல், சீர்திருத்தச் சாமியாட்டம், உறங்கும் கடல் போன்ற சில கட்டுரைகளே குறிப்பாக ஈர்க்கின்றன. இரயில் நிலையங்களின் தோழமை அளவுக்கு தேசாந்திரி கவரவில்லை. இருப்பினும், இக்கட்டுரைகளுக்குப் பின்னுள்ள மாறுபட்ட பயணங்களும் அனுபவங்களைத் தேடிச் செல்லும் வாழ்க்கையும் வியப்பையும் ஊக்கத்தையும் தருகின்றன. பல இடங்களை அறிமுகப்படுத்தும் இந்த நூலைப் பயண விரும்பிகள் வாசிக்கலாம்.

தெரிந்த இடங்களுக்குள் மறைந்திருக்கும் கதைகளையும் அன்றாடம் கவனிக்காமல் கடக்கும் சிறிய விஷயங்களையும் தேசாந்திரி கூர்ந்து பார்க்க வைக்கிறது. பயணம் என்பது இடம் மாறிச் சென்று காட்சிகளையும் உணவையும் ரசிப்பதோடு முடிவதில்லை என்பதை இந்தக் கட்டுரைகள் உணர்த்துகின்றன. இயற்கையையும் மனிதர்களையும் இன்னும் நெருக்கமாகக் கவனிக்கத் தூண்டும் எழுத்து; வாழ்க்கையைப் பார்க்கும் விதத்தையே மாற்றக்கூடிய பயண அனுபவங்கள் இதில் நிறைந்துள்ளன.

இந்தியப் பயணங்களைப் பற்றித் தமிழில் அமைந்த மிகச் சிறந்த நூல்; பயண நூல்களில் ஓர் அரிய படைப்பு.

இளமைக்கால நினைவுகளைத் தூண்டும் எழுத்துநடை கொண்ட அருமையான நூல். சென்ற ஊர்களைப் பற்றிச் சொல்வதோடு, அங்கே ஆசிரியரின் மனநிலை எப்படி இருந்தது என்பதையும் காட்டுகிறது. அந்த இடங்களை நேரில் சென்று பார்க்கும் ஆவலை ஏற்படுத்துகிறது.

பெரும்பாலும் தமிழகத்தைச் சார்ந்த இந்தியப் பயணங்களைப் பதிவு செய்யும் தேசாந்திரி, வாசித்தபடியே பல இடங்களுக்குச் சென்று வந்த உணர்வைத் தருகிறது. வரைபடத்தைத் தாண்டி நாட்டையும் மனிதர்களையும் அறியப் பயணம் தேவை என்பதை எஸ்.ரா வலியுறுத்துகிறார். பழமையான ஓவியங்களை ஏன் பாதுகாப்பதில்லை, வரலாற்றின் மீதான ஆர்வம் ஏன் பாடப்புத்தகங்களோடு நின்றுவிடுகிறது என்ற கேள்விகள் சிந்திக்க வைக்கின்றன.

எஸ்.ராவின் இந்தியப் பயணக் கட்டுரைகளில் சில குழந்தைப் பருவ நினைவுகளைத் தூண்டுகின்றன; சில நம் அலட்சியத்தை வலுவாகக் கேள்விக்குள்ளாக்குகின்றன. கைப்பேசிக் கேமராவுக்கு அப்பால் நேரில் பார்த்து ரசிப்பதன் அவசியத்தை உணர்த்துகிறது நூல். பழமையான ஓவியங்களையும் கற்றளிகளையும் பராமரிப்பின்றிச் சிதையவிடுவது வருத்தமளிக்கிறது. பயணம் எப்படி அமைய வேண்டும் என்ற பார்வையைத் தந்து, அவர் சென்ற இடங்களுக்குச் செல்லும் ஆர்வத்தையும் ஏற்படுத்துகிறது.

பயணக் குறிப்புகளுடன் வாழ்க்கையின் சிறிய மகிழ்ச்சிகளையும் கவனிக்கச் செய்கிறார் எஸ்.ரா. வீட்டிலிருந்து தொடங்கி மீண்டும் வீட்டை நோக்கித் திரும்பும் பயணங்களை அமைத்திருக்கும் விதம் அழகு. எளிய நடையும் பகுதிகளின் தொடக்கக் கவிதைகளும் கவர்கின்றன. பரங்கிமலை போன்ற பழக்கமான இடங்களின் அறியாத சிறப்புகளை எடுத்துரைத்து, தொலைதேசம் செல்லாமலேயே சுற்றியுள்ள இயற்கையையும் வரலாற்றையும் தேடிப் பார்க்க ஊக்கமளிக்கிறது இந்த நூல்.