லக்ஷ்மி சரவணகுமார் நூல்கள் · Lakshmi Saravanakumar Books

லக்ஷ்மி சரவணகுமார் (இயற்பெயர் ராஜா சரவணகுமார்) 1985ம் ஆண்டு மதுரை மாவட்டம் திருமங்கலத்தில் பிறந்தவர். தந்தை சிறையில் இருந்ததால் பத்து வயது வரை அனாதை இல்லமொன்றில் வளர்ந்த இவர், குடும்பச் சூழல் காரணமாக பதினோராம் வகுப்புடன் படிப்பை நிறுத்திக்கொண்டார். பதினேழு வயதிலேயே தீக்கதிர், செம்மலர் போன்ற இதழ்களுக்குக் கவிதைகள் எழுதத் தொடங்கியவர், பின்னர் கல்கி இதழில் உபசெயலாளராகவும், திரைத்துறையில் இயக்குனர் உதவியாளராகவும் பணியாற்றியுள்ளார்.

உப்பு நாய்கள், கானகன், நீலப்படம், கோமோரா, ரூஹ் உள்ளிட்ட ஒன்பது நாவல்களையும், ஏழு சிறுகதைத் தொகுப்புகளையும், ஒரு கவிதைத் தொகுப்பையும் எழுதியுள்ள இவரது படைப்புகள் ஓரங்கட்டப்பட்ட மனிதர்களின் வாழ்க்கை, பாலியல், வன்முறை போன்றவற்றை நேரடியாகவும் தீவிரமாகவும் பேசுகின்றன. உப்பு நாய்கள் நாவலுக்காக 2012ம் ஆண்டு சுஜாதா நினைவு விருதும், கானகன் நாவலுக்காக 2016ம் ஆண்டு சாகித்திய அகாதமியின் யுவ புரஸ்கார் விருதும் பெற்றுள்ளார். மயான காண்டம் எனும் குறும்படத்தை இயக்கியுள்ள இவர், பொன்மகள் வந்தாள், இந்தியன் 2 உள்ளிட்ட திரைப்படங்களுக்கு வசனமும் எழுதியுள்ளார்.