மத்திய ஆசியாவின் ஸ்டெப்பி புல்வெளிகளிலிருந்து மேய்ச்சல் நிலம் தேடி இந்தியத் துணைக்கண்டத்திற்குள் புலம்பெயர்ந்த ஆரியர்கள், இங்கு வேரூன்றியிருந்த தொல்குடி சமூகங்களின் பண்பாட்டை எவ்வாறு சிதைத்தனர் என்ற கேள்வியிலிருந்து தொடங்குகிறது இந்த ஆய்வு. ரிக் வேதத்தில் இடம்பெறும் ஆப்கானிய ஆறுகளும், அதில் குறிப்பிடப்படாத ஆலமரமும் விந்தியமலையும், ஆரியர்கள் இம்மண்ணின் சொந்தக்காரர்கள் அல்ல என்பதை நிரூபிக்கின்றன. வேதங்கள் தொடங்கி புராணங்கள் வரை, மனுவின் சட்டங்கள் தொடங்கி கோவில் குடமுழுக்கு வரை — சாதியம் தன்னை எவ்வாறு அறிவியல்பூர்வமாகவும் தத்துவார்த்தமாகவும் கட்டமைத்துக் கொண்டது என்பதை ஆதாரங்களுடன் அம்பலப்படுத்துகிறது இந்நூல்.

பதினாறு கட்டுரைகள் கொண்ட இரு பகுதிகளாக அமைந்த இந்நூல், சாதியம் மனிதர்களிடம் மட்டும் அல்ல — ஐம்பூதங்களிலும், திசைகளிலும், தாவரங்களிலும், விலங்குகளிலும், பறவைகளிலும் கூட ஊடுருவியிருக்கிறது என்ற திடுக்கிடும் உண்மையை கண்முன் நிறுத்துகிறது. நாய் கீழே பசு மேலே, நெய்தல் கீழே தாமரை மேலே, தெற்கு தீட்டு கிழக்கு புனிதம் — இயற்கையின் ஒவ்வொரு அடுக்கிலும் படிந்திருக்கும் சாதியக் கறையை சூழலியல் நோக்கில் தோலுரிக்கும் இந்நூல், "இயற்கையை நேசிக்கும் எவரும் சாதியை நேசிக்க முடியாது" என்ற தெளிவான முடிவுக்கு வாசகர்களை இட்டுச்செல்கிறது. சங்ககாலம் தொடங்கி பெரியார் வரையிலான மேற்கோள்களுடன், அறிவியல்பூர்வமான ஆய்வும் எளிமையான நடையும் கொண்ட இந்தப் படைப்பு, சூழல் செயல்பாட்டாளர்கள் மட்டுமின்றி ஒவ்வொரு விழிப்புணர்வுள்ள வாசகரும் கட்டாயம் படிக்க வேண்டிய நூல்.