சீலனின் கடந்தகாலம் குறித்த கேள்விகளும் மன உளைச்சலும் வாசிப்பில் நெருக்கமாக உணரப்படுகின்றன. டேனியலின் பயணங்களும் தேடல்களும் ஏராளமான தகவல்களை அறிமுகப்படுத்துவதோடு சமூகப் பிரச்சினைகளின் தீவிரத்தையும் புரியவைக்கின்றன. புனைவையும் தரவுகளையும் இணைக்கும் எழுத்துநடை சிறப்பு. இருளன், கடக்கரை, அபு ஆகியோர் நினைவில் நிற்கிறார்கள். வாசித்து முடித்த பின்னும் தாக்கமும் தேடலும் தொடரும் இந்த நூல், ஒவ்வொரு வீட்டிலும் இருக்கத் தகுந்தது.

கதைக்குள் கதையாக விரியும் தட்டப்பாறை, தகவல்களை மேலும் தேடிப் படிக்கத் தூண்டுகிறது. டேனியல், கடக்கரை ஆகியோர் எளிதில் மனதில் பதிகிறார்கள்; அபு–சௌமியா காதலும் அழகு. ஆதிவாசிகளின் வேர்கள், மலைவாழ் மக்கள் மற்றும் தேயிலைத் தொழிலாளர்களின் துயரங்கள், இலங்கை அகதிகளின் வாழ்க்கை ஆகியவற்றைக் கதையுடன் இணைத்ததில் ஆசிரியரின் உழைப்பு தெரிகிறது. எனினும், ஒரு கட்டத்தில் தகவல்களின் மிகுதி திகட்டுகிறது. நமது வேர்களைத் தேடுவதற்கான தொடக்கமாக அமையும் நாவல்.