அருமையான வாசிப்பு.

தமிழின் சிறந்த எழுத்தாளர்களை அவர்களுடைய கதைகளின் வழியே அறிமுகப்படுத்துகிறார் விமலாதித்த மாமல்லன். அந்த அறிமுகத்திலிருந்து அவர்களது பிற படைப்புகளைத் தேடிச் செல்லலாம். பூமணியின் ‘நிலை’ கதைக்கான விளக்கம் குறிப்பாக மனதைத் தொடுகிறது. சமூக அடுக்குகளின் பெயர்கள் மாறினாலும் அவற்றின் செயல்பாடுகள் மாறுவதில்லை என்ற எண்ணத்தை அது எழுப்புகிறது.

சிறுகதையில் சொல்லப்படாதவற்றையும் கவனித்து வாசிக்க உதவும் நூல். பன்னிரண்டு எழுத்தாளர்களின் பன்னிரண்டு கதைகளை எடுத்துக்கொண்டு, அவற்றின் உட்கருத்தை அணுகும் வழிகளை விமலாதித்த மாமல்லன் விளக்குகிறார். சூழல், காலம், மனநிலை ஆகியவற்றோடு கதையைப் பொருத்திப் பார்க்கத் தூண்டுகிறது. ஒவ்வொரு கதைக்கும் இப்படியொரு விளக்கம் கிடைத்தால் நன்றாக இருக்குமே என்று தோன்றினாலும், வாசகரே நுட்பங்களை உணரும் திறனை வளர்த்துக்கொள்வதுதான் முக்கியம். கடினமாகத் தோன்றும் படைப்புகளை அணுகுவதற்கான தயக்கத்தைக் குறைக்கும் நூல்.

அழகான சொல்லோட்டம். வாசிப்பிலும் எழுத்திலும் ஆர்வத்துடன் தொடங்குபவர்களுக்கு ஏற்ற நல்ல நூல். வாங்கிப் படிக்கப் பரிந்துரைக்கலாம்.