Reviews for நளினி

ஐம்பதுகளின் அக்ரஹார வாழ்க்கையைச் சுவையாகச் சித்தரிக்கிறார் க.நா.சு. சிற்றன்னையின் கெடுபிடிகளைப் பொருட்படுத்தாத நளினியின் துணிச்சலும், சீதாராமனை நம்பலாமா என்ற குழப்பமும் கதைக்கு வலு சேர்க்கின்றன. மனப்போராட்டங்களில் மிகையில்லை; சம்பவங்கள், எண்ணங்கள், உணர்வுகள் சீராகக் கலந்து செல்கின்றன. ஆனால் அந்தக் கதைப்போக்குடன் ஒப்பிடும்போது முடிவு சட்டென வந்துவிடுவதாகத் தோன்றுகிறது.

தஞ்சை அக்ரஹாரத்தைப் பின்னணியாகக் கொண்ட எளிய கதை. கதாபாத்திரங்களின் வாழ்க்கைமுறை, குறிக்கோள், அவரவர் நீதி நியாயம் ஆகியவற்றை அமைத்துவிட்டு அவற்றின் வழியே கதையை நகர்த்துகிறார் க.நா.சு. சிற்றன்னையிடம் வளரும் நளினி மனதில் இடம்பிடிக்கிறாள். அறுபது, எழுபதுகளில் வந்த குற்றப் பின்னணியுள்ள குடும்பத் திரைப்படங்களை நினைவூட்டுகிறது நாவல்.

பத்துக்கும் குறைவான கதாபாத்திரங்களைக் கொண்டு எளிமையாகவும் சிறப்பாகவும் கதை சொல்லியிருக்கிறார் க.நா.சு. இடையிடையே வரும் நுட்பமான நகைச்சுவையும் ரசிக்க வைக்கிறது.

அதிகம் படிக்காத நளினியிடம் இருக்கும் துணிச்சல், படித்த பெண்கள் பலரிடம் இல்லாதது சிந்திக்க வைக்கும் முரண். அன்பின் கட்டுப்பாட்டிலிருந்து விடுபட விரும்பாத மனமும் இதற்குக் காரணமாக இருக்கலாம்.

ஓர் அக்ரஹாரத்தில் மிகச் சில கதாபாத்திரங்களோடு ஆழமான கேள்வியை எழுப்புகிறது இந்தச் சிறிய நாவல். க.நா.சு.வின் இயல்பான கதைசொல்லலில் நுட்பமான நகைச்சுவையும் கலந்திருக்கிறது. பணத்துக்காகக் குற்றங்களைக்கூட ஏற்றுக்கொள்ளும் மனிதர்களுக்கு நடுவே, நளினியின் உறுதி வியக்க வைக்கிறது. தன்னைச் சுற்றியுள்ள கசப்புகளைப் பொருட்படுத்தாமல் வளரும் அவள், சிந்திக்க வைக்கும் அழகான கதாபாத்திரம்.

அக்ரஹார வாழ்க்கையையும் அங்குள்ள பெண்களின் புறம்பேசும் மனப்போக்கையும் ஆசிரியர் சித்தரித்திருப்பது பிடித்திருக்கிறது. சின்னம்மாள், நளினி பற்றிய பார்வையும் ரசிக்கத்தக்கது. ஆனால் அறிவும் எதிர்ப்புணர்வும் கொண்டவளாக வரும் நளினி, எதிர்காலத்தை யோசிக்காமல் வாழ்க்கையை மாற்றும் முடிவை எடுப்பது பொருந்தவில்லை. அந்த முடிவுக்கு முன் அவள் என்ன சிந்தித்தாள் என்பதும் விளக்கப்படாததால், திருமணத்துக்கு முந்தைய அவளது இயல்போடு அது ஒட்டவில்லை.