வேலையின்றி உறவினர்களின் அலட்சியத்துக்கு ஆளாகும் பட்டதாரி இளைஞன், வேலை கிடைத்து மும்பை சென்றபின் அங்குள்ள மோசமான சூழலில் வாழ்வதைச் சுவாரஸ்யமாகச் சொல்கிறார் நாஞ்சில் நாடன். அவரது எழுத்து படிக்கத் திகட்டாததாக இருந்தாலும், இந்த நாவலின் முடிவை இன்னும் சிறப்பாக அமைத்திருக்கலாம்.

பிழைப்புக்காகப் புலம்பெயரும் கதையைச் சுவாரஸ்யமாகச் சொல்லும் நாவல்.

பொறுப்புகளையும் கனவுகளையும் சுமந்து நகரம் செல்லும் முதல் தலைமுறைப் பட்டதாரிகளின் பாடுகள், மகிழ்ச்சி, ஏக்கங்கள் உணர்வோடு பதிவாகின்றன. பம்பாயின் புழுக்கமும் வெக்கையும் வாசிப்பில் புலப்படுகின்றன. சண்முகத்தின் உணர்வுகளோடு ஒன்றி, அவன் வெற்றிபெற வேண்டும் என்று ஏங்கச் செய்கிறது கதை. இன்றும் நகரங்களில் அவனைப் போன்ற பலர் வாழ்வதையும், நகர வாழ்வில் கிராம நினைவுகள் தொடர்வதையும் நினைக்க வைக்கிறது.

வேலையில்லாப் பட்டதாரியின் போராட்டத்தையும் வாழ்வாதார நெருக்கடியையும் பேசும் மிதவை, நெருக்கமான உணர்வைத் தரும் மறக்க முடியாத நாவல். நாஞ்சில் நாடனின் சொற்கள் மிகைப்படுத்தாமல் நிகழ்வுகளைக் காட்சியாக்கி, அவற்றின் உணர்வுகளையும் இயல்பாகக் கடத்துகின்றன. வாழ்க்கையை விமர்சனத்துடனும் எள்ளலுடனும் சற்றே விலகிப் பார்க்கத் தூண்டும் எழுத்து இதன் சிறப்பு.

வேலை தேடிப் பம்பாய் செல்லும் கிராமத்துப் பட்டதாரியின் கனவுகளையும் அச்சங்களையும் திண்டாட்டங்களையும் நுட்பமாகப் பதிவு செய்கிறது மிதவை. சாதி வேறுபாடுகள், அலுவலக அரசியல், நகரின் அடிப்படை வசதியின்மை எனப் புலம்பெயர் வாழ்வின் சிரமங்களை மறைக்காத எழுத்து. உயிரோட்டமான மனிதர்களும் தொய்வில்லாத நடையும் வாசிப்பைச் சுவையாக்குகின்றன. நாஞ்சில் நாடனின் வழக்கமான பகடி சற்றுக் குறைந்ததாகத் தோன்றினாலும், எழுத்தின் நேர்மை இன்றும் ரசிக்க வைக்கிறது. வாசித்துப் பார்க்க வேண்டிய நாவல்.