அறிந்துகொள்ள வேண்டிய விஷயங்களுக்கும் விடை தேடிக்கொண்டிருக்கும் கேள்விகளுக்கும் இந்த நேர்காணல் பதிலளிக்கிறது. தொ.ப. தனது கருத்துகளோடு பல மனிதர்களையும் நூல்களையும் அறிமுகப்படுத்துகிறார். அவரது ஆய்வுப் பார்வை பல விஷயங்களைப் புரிந்துகொள்ள உதவுகிறது.

அறிந்ததைத் தாண்டி அறிய வேண்டியவை எவ்வளவோ உள்ளன என்பதை உணர்த்தும் நூல்.

தமிழ்ச் சமூகத்தின் அதிகம் கவனிக்கப்படாத மானுடவியல் கூறுகளைத் தொ.ப. தயக்கமின்றிப் பேசும் சிறப்பான நேர்காணல். கேள்வி பதில்கள் ஒரு தலைப்புக்குள் நின்றுவிடாமல் பல தளங்களுக்கு விரிகின்றன. தொடர்ந்து தேடி வாசிப்பதற்குப் பல நூல்களை அறிமுகப்படுத்துவது இதன் முக்கியச் சிறப்பு.

தொ.பரமசிவனின் நேர்மையான பதில்கள் இந்த நேர்காணலைத் தொடர்ந்து வாசிக்கத் தூண்டுகின்றன. அவர் தரும் சிறு குறிப்புகள்கூட வியப்பையும் மேலும் அறிந்துகொள்ளும் ஆர்வத்தையும் ஏற்படுத்துகின்றன. மயிலை வேங்கடசாமியுடனான சந்திப்பையும் உரையாடலையும் பற்றிய பகுதி குறிப்பாக மகிழ்ச்சி தருகிறது.

தெரிந்ததைத் தெளிவாக விளக்குவதும் தெரியாததை ஒப்புக்கொள்வதும் தொ.ப.வின் நேர்காணலுக்குத் தனிச் சிறப்பு. அன்றாடப் பழக்கவழக்கங்கள், பண்டிகைகள், அரசியல், சங்க இலக்கியம் எனப் பலவற்றைப் பற்றிய அவரது பதில்கள் எளிமையாகவும் விரிவாகவும் அமைந்துள்ளன. அவர் குறிப்பிடும் நூல்கள் பரந்த வாசிப்பை உணர்த்துகின்றன. மனிதர்களையும் சுற்றுப்புறத்தையும் கவனிப்பதன் வழியே பண்பாட்டைப் புரிந்துகொள்ளச் செய்யும் இந்நூல், பழகிய கருத்துகளையும் மறுபரிசீலனை செய்யத் தூண்டுகிறது.