Reviews for எதிர்கால நினைவுகள்

நல்ல கதை; மறுநாளுக்குத் தள்ளிவைக்க முடியாதபடி ஒரே அமர்வில் வாசிக்கத் தூண்டுகிறது. மாற்று முடிவையும் அறிய ஆவலாக இருக்கிறது.

காலவரிசையை மாற்றிச் சொல்லும் விறுவிறுப்பான கதை, ஒரே அமர்வில் வாசிக்க ஏற்றது. தமிழில் ஒரு நல்ல முயற்சி. அன்றாடம் பயன்படுத்தும் பொருட்களுக்கான சரியான தமிழ்ச்சொற்களை ஆசிரியர் கையாண்டிருப்பது பாராட்டுக்குரியது. அவை திரும்பத் திரும்ப வருவதால் மனதில் பதிகின்றன. நண்பர்களுக்கும் பரிந்துரைக்கத்தக்க, தவறவிடக் கூடாத வாசிப்பு.

குமரன், வள்ளி, மணி, யாழினி, முத்து எனச் சில பாத்திரங்களையும் மரச் சுவர்க்கடிகாரத்தையும் வைத்துக்கொண்டு கதை சொன்ன விதம் சிறப்பாக இருக்கிறது. காலவரிசையை மாற்றியமைத்துச் சொல்லும் உத்தி நன்றாகக் கைகூடியிருக்கிறது. கதையை உருவாக்குவதோடு நிற்காமல், அதை வசீகரமாகச் சொல்லியிருப்பதே இந்த நூலின் சிறப்பு.

காலவரிசைப்படி அமையாத வாழ்க்கையை வாழும் ஒருவரைப் பற்றிய சுவாரசியமான அறிவியல் புனைவு. தமிழில் இந்த வகைக் கதைக்கான நல்ல முதல் முயற்சி. பெரிய தத்துவ விசாரணைகளையோ தேவையற்ற பகட்டையோ நாடாமல், எளிமையான விறுவிறுப்பான கதையை நன்றாகச் சொல்லியிருக்கிறார் பலராமன். இதுபோன்ற மேலும் பல முயற்சிகள் அவரிடமிருந்து வரட்டும்.

தமிழில் சுயமாக வெளியிடப்படும் மின்னூல்களில் மாறுபட்ட கதைக்களம். எளிமையும் அழகும் கொண்ட நடை; நூலின் அளவும் விரைவாக வாசித்து முடிக்க ஒரு காரணமாக இருக்கலாம். தமிழ்ச்சொற்களைப் பயன்படுத்துவதற்காக வாக்கியங்களைச் சிக்கலாக்கவில்லை. நவீனப் பொருட்களுக்கான தமிழ்ச்சொற்களுடன் அவற்றின் விளக்கங்களையும் தந்திருப்பது உதவுகிறது. எதிர்பாராத இறுதித் திருப்பம் கார்த்திக் சுப்புராஜின் படங்களை நினைவூட்டுகிறது.

தமிழில் புதுமையான முயற்சி. தொடக்கம் முதல் முடிவுவரை விறுவிறுப்பு குறையாமல், ஒரே அமர்வில் வாசிக்கத் தூண்டுகிறது. சிக்கலான கதை அமைப்பைக் குழப்பமின்றிச் சொல்லியிருப்பது பாராட்டத்தக்கது. வாசிப்பில் வியப்பளிப்பதோடு பல புதிய தமிழ்ச்சொற்களையும் அறிமுகப்படுத்துகிறது.

கதையின் அமைப்பு மிகவும் சிக்கலானது. அதை ஆசிரியர் சிறப்பாகக் கையாண்டிருக்கிறார்.

கனவையும் காலப்பயணத்தையும் இணைத்து, மணி விழித்தெழும் ஒவ்வொரு முறையும் வெவ்வேறு காலங்களுக்குள் அழைத்துச் செல்கிறது கதை. நிகழ்வுகள் முன்னும் பின்னுமாக நகர்ந்தாலும் அவற்றின் தொடர்பைப் புரிந்துகொள்வதில் குழப்பமில்லை. குடும்பப் பாசம், நட்பு, காதல், துரோகம் ஆகியவற்றோடு அறிவியல் புனைவும் கலந்திருக்கிறது. நடை சுஜாதாவை நினைவூட்டுகிறது; அன்றாடக் கருவிகளுக்குப் பயன்படுத்திய தமிழ்ச்சொற்களும் கவனிக்க வைக்கின்றன. திரைப்படமாக்குவதற்கும் ஏற்ற கதை.

திரைக்கதையின் விறுவிறுப்புடன், கதையில் ஓட்டையில்லாமல் அமைந்த அறிவியல் புதினம். நல்ல தமிழும் கலைச்சொற்களும் பெயர்களில் அமைந்த குறியீடுகளும் சிறப்பு. திரைப்படமாக்க ஏற்ற கதை. முடிவுக்குப் பிறகு தனியே வெளியிடப்பட்ட நீட்சியும் மாறுபட்ட முயற்சி; அதில் நாயகனின் பார்வையையும் சேர்த்திருந்தால் இன்னும் சிறப்பாக இருந்திருக்கும். சில ஒற்றுப்பிழைகள் இருந்தாலும் வாசிக்கத் தகுந்த நல்ல நூல்.