கலையைப் புதிய கோணங்களில் அணுகும் பார்வையும் கலைக் கருத்துகளை அறிமுகப்படுத்தும் விதமும் சிறப்பு. வான் கா, தகேஷி கிடானோ பற்றிய பகுதிகளும் மாய யதார்த்தம், சர்ரியலிசம் போன்றவை குறித்த விளக்கங்களும் ஈர்க்கின்றன. ‘கலையும் பித்தும்’ கட்டுரை தனித்த அனுபவம் தருகிறது. வழக்கமான திரைப்படத் தகவல்களைத் தாண்டிய கலைப்பார்வை கொண்ட நூல்; எழுத்துப்பிழைகள் அதிகமாக இருப்பது குறை.

ஓவியம், இசை, திரைப்படம், இலக்கியம் எனப் பல கலைகளையும் அவற்றுக்காகத் தங்களை அர்ப்பணித்த கலைஞர்களையும் தெளிவாக அறிமுகப்படுத்துகிறது. குறிப்பாக மீறல் பற்றிய கட்டுரையும் ‘கலையும் பித்தும்’ கட்டுரையும் கவனிக்கத்தக்கவை. ரூஜி என்ற புனைவுப் பாத்திரம் சிறப்பாக உருவாகியிருந்தாலும், அதன் கடிதங்களையும் கனவுலகையும் இன்னும் விரிவாக்கியிருக்கலாம். எழுத்துப்பிழைகளைத் திருத்தி நடையையும் செம்மைப்படுத்தியிருந்தால் நூல் மேலும் சிறந்திருக்கும்.