Reviews for அவளது வீடு

வெவ்வேறு சிறுகதைகளைத் தேர்ந்தெடுத்துத் தொகுத்திருந்தாலும், அவற்றுக்குள் ஓர் ஒற்றுமை தெரிகிறது.

கதைகள் மிகச் சுமாராகவும் சுவாரசியமின்றியும் உள்ளன. பெண் கதாபாத்திரங்களிடம் பெயர்களைத் தவிர வேறுபாடு தெரியவில்லை; அனைவரும் ஒரே மாதிரியாகத் தோன்றுகின்றனர். நடையும் சலிப்பூட்டுகிறது. இரமணிசந்திரன் ரசிகர்களுக்கு வேண்டுமானால் பிடிக்கலாம்.

பத்து வாசகர்களின் உதவியுடன் தேர்ந்தெடுக்கப்பட்ட இருபது சிறுகதைகளில் பல்வகைமையும் சமநிலையும் தெரிகின்றன. மனித உணர்வுகளையும் உறவுகளையும் அன்றாட வாழ்வையும் மிகையின்றி அணுகுவது வாசிப்பில் ஈர்ப்பை ஏற்படுத்துகிறது. வீடு என்பது கட்டிடம் மட்டுமல்ல; நினைவுகள், சார்ந்திருக்கும் உணர்வு, மனவுலகம் ஆகியவற்றோடும் இணைகிறது. நுட்பமான, சிந்திக்க வைக்கும் எழுத்தை விரும்புவோருக்கு ஏற்ற அமைதியான தொகுப்பு.

பெண்களின் வாழ்க்கைப் போராட்டங்களை முதன்மையாகக் கொண்ட இருபது சிறுகதைகளின் தொகுப்பு. நம்மைச் சுற்றியுள்ள சாதாரண மனிதர்களின் அசாதாரணமான வாழ்க்கையை வேறொரு கோணத்தில் காட்டுகிறது. அமானுஷ்யக் கதையும் இதில் இடம் பெறுகிறது. வாசித்து முடித்த பின்னும் விடை காணாத பல கேள்விகளை எழுப்பும் இந்நூல், எஸ். ராமகிருஷ்ணனின் படைப்புகளில் மிகவும் பிடித்தவற்றில் ஒன்று.

சொந்த வீட்டுக் கனவு, வாசிப்புக்கான தடைகள், அமிலத் தாக்குதலுக்குப் பிறகான சமூகப் புறக்கணிப்பு எனப் பெண்கள் எதிர்கொள்ளும் ஒடுக்குமுறைகளை இக்கதைகள் உணர வைக்கின்றன. சாதாரணச் செய்தியாகக் கடந்துவிடும் துயரங்களைக்கூட வேறுவிதமாகப் பார்க்கத் தூண்டுகின்றன. ‘எம்பாவாய்’, ‘ஆண் மழை’, ‘கற்பனை சேவல்’ உள்ளிட்ட கதைகளில் தனிமையும் மனிதர்களின் பழக்கங்களும் நெருக்கமாகப் பதிவாகின்றன. பெண்களின் சிறிய ஆசைகளையும் தனித்தன்மையையும் மதிக்க வேண்டியதன் அவசியம் தொகுப்பில் வெளிப்படுகிறது.

சுவாரசியமான மனிதர்களை அறிமுகப்படுத்தும் இந்தத் தேர்ந்தெடுத்த சிறுகதைத் தொகுப்பில் மிகச் சிறந்தது ‘எம்பாவாய்’. ஆணாதிக்கக் குடும்பத்தில் ஒடுக்கப்படும் பெண் தன் விருப்பத்திற்குரிய எழுத்தாளரைச் சந்திப்பதில் சிறிது நேரம் மகிழ்ச்சி காணும் கதை அது. செகாவையே பாத்திரமாக்கிய கதையும் கவனிக்கத்தக்கது; ரஷ்ய இலக்கியத்தின் மீதான எஸ்.ராமகிருஷ்ணனின் ஈடுபாடு அதில் தெரிகிறது. உயர்ந்த எண்ணங்களும் கவித்துவமான நடையும் இணைந்த புனைவுலகம் இது.

திருப்தியளிக்கும் சிறுகதைத் தொகுப்பு. எஸ்.ராவின் தனித்துவமான பாத்திரச் சித்தரிப்பும், ஒவ்வொரு கதையிலும் மனிதர்களைப் பற்றிய ஆழமான விவரிப்பும் தொடர்ந்து படிக்கும் ஆர்வத்தை ஏற்படுத்துகின்றன.

எஸ்.ராமகிருஷ்ணனின் புனைவுகள் மீதான எதிர்பார்ப்பை நிறைவேற்றும் தொகுப்பு. வழக்கத்திலிருந்து மாறுபட்ட மனிதர்களின் வாழ்க்கையைப் பார்க்கச் செய்து, அவர்களைச் சமூகம் ஏற்க மறுப்பதைச் சிந்திக்க வைக்கிறது. பெண்களின் நியாயமான விருப்பங்களைக்கூட ஒடுக்கும் ஆணாதிக்கத்தை ‘அவளது வீடு’ நுட்பமாக வெளிப்படுத்துகிறது. இருபது கதைகளும் சலிப்பின்றி நகர்ந்தாலும், ‘வெறும் இருட்டு’, ‘பனாரஸ்’ மற்ற கதைகளைப் போலக் கவரவில்லை. ‘ஆண் மழை’, ‘எம்பாவாய்’, ‘பதினாறு டயரிகள்’ உள்ளிட்ட பல கதைகள் மனதுக்கு நெருக்கமாகின்றன.

எஸ்.ராமகிருஷ்ணனின் கதைகளிலிருந்து வாசகர்கள் தேர்ந்தெடுத்த இருபது கதைகள் அடங்கிய நல்ல தொகுப்பு. விசாலமான வீட்டை விரும்பும் அகல்யாவின் ஆசையைச் சொல்லும் ‘அவளது வீடு’, குடும்பக் கட்டுப்பாடுகளுக்கு நடுவே எழுத்தின் வழியாக நட்பைக் கண்டடையும் நன்மதியின் ‘எம்பாவாய்’ ஆகியவை குறிப்பாகக் கவர்கின்றன. வாசிக்கப் பரிந்துரைக்கத்தக்க நூல்.