அன்றாட வாழ்வின் எளிய விஷயங்களைக் கொண்டு எழுதிய கவிதைகள் வழியே ஆத்மாநாமின் ஆளுமை வெளிப்படுகிறது. தீவிரமாகத் தொடங்கி நையாண்டியாக முடியும் கவிதைகள் இன்றைய அரசியலுக்கும் சமூகத்துக்கும் பொருந்துகின்றன. சிக்கலான விஷயங்களைச் சில வரிகளுக்குள் அடக்கும் திறன் குறிப்பிடத்தக்கது. சிந்தனையையும் சிரிப்பையும் சிலிர்ப்பையும் தரும் தொகுப்பு.

ரசிக்கத்தக்க கவிதைகளும் உற்சாகமூட்டும் கவிதைகளும் புரட்சிக் கவிதைகளும் கொண்ட நல்ல தொகுப்பு.

எளிய சொற்களிலேயே ஆழமான அனுபவங்களையும் பலவிதமான வாசிப்புகளையும் தருகின்றன ஆத்மாநாமின் கவிதைகள். முழுத் தொகுப்பாக வாசிக்கையில் அவரது படைப்பு மனதை நெருங்க முடிகிறது. சமூகத்தின் மீதான கோபத்தோடு எளிய மக்களுக்கான அக்கறையும் மாற்றத்திற்கான நம்பிக்கையும் வெளிப்படுகின்றன. தன் இருப்பைத் தேடும் அகக் கவிதைகள் வேறொரு அனுபவத்தைத் தருகின்றன. கல்யாணராமனின் கனல் வட்டம் இவற்றை அணுக உதவுகிறது; அதன் சில மதிப்பீடுகளில் மாற்றுக் கருத்தும் போதாமையும் இருந்தாலும், தொகுக்கப்பட்ட தரவுகள் வியக்க வைக்கின்றன.